Belaunaldi arteko etxebizitza komunitarioa

Tolosako Udalak belaunaldi arteko etxebizitza proiektu bat abiatu du Iurramendin. Zehazki, Paper kaleko biribilgunearen alboan, gaur egungo etxeen eta Iurreamendi pasealekuan eraikitzen ari diren eraikinen arteko orubean. Alokairu erregimeneko babes ofizialeko etxebizitzak egitea dago aurreikusia, baina eredu berritzaileak jorratu nahi ditu udalak.

Bi adin-tarte hartzen dituzten bi kolektibori –gazteei eta adinekoei– lekua egin, eta elkarren arteko elkarbizitza sustatzea da nahia. Modu horretara, bi helburu lortu nahi ditu Udalak: alde batetik, gazteen emantzipazio beharrari beste irtenbide bat ematea; eta, bestetik, adinekoentzako zaintza-ikuspegia bilduko duen etxebizitza-eredu bat sustatzea.

Egun, gazteak eta adinekoak etxebizitza-merkatutik baztertuta sentitzen dira, diru-sarrerengatik lehenak, eta irisgarritasun, kokaleku, bakardade eta bestelako ezaugarri eta beharrengatik bigarrenak. Hori dela eta, izaera publiko-komunitarioko eredu bat sustatu nahi dugu, hobeto egokituko dena bi kolektibo horien gaur egungo beharretara

Herritarrek egindako eskari bat da eredu berriak bilatzearena. Zehazki, Herritarren Batzarrak egindako gomendioetako bat izan zen, eta Gazteparte prozesuan ere bide hori jorratzeko eskaera egin zuten 18 eta 30 urte bitarteko gazteek. 

Prozesuaren abiapuntua azaroaren 20ko jardunaldia izan zen, eta ondoren parte-hartze prozesuari eman zaio hasiera.

Galdetegia, herritar orori zuzenduta
Era berean, online galdetegi bat ere sortu zen, jakiteko zer iritzi duten herritarrek belaunaldiarteko etxebizitza horiek izan beharko lituzketen ezaugarrien inguruan (dagoeneko itxita dago).